د تحصیلي بورسیو ډولونه

کور / د محصلینو د بریا مرکز / بورسیې او مالي مرستې / د تحصیلي بورسیو ډولونه

کاردان پوهنتون ستاسې استعداد، په بېلابېلو پروګرامونو کې فعال رول او لاسته راوړنې ستایي. مونږ له همدې امله یو ډېر شمېر بورسیې او تحصیلي لګښتونه د اړمنو محصلینو لپاره په پام کې نیولي دي. علمي لوړوالي او تحصیلي وړتیاو ته د ارزښت ورکولو او په رسمیت پېژندلو لپاره کاردان پوهنتون یو شمېر مالي مرستې او تحصیلي بورسیې پیل کړي دي.

کاردان پوهنتون هغو محصلینو ته تحصیلي بورسیې ورکوي، چې په تحصیلي ډګر کې له ځانه وړتیا او په تحصیلي او کاري چاپېریال کې د نظم او دیسپلین معیارونو ته ژمنتیا وښيي.

له بورسیو او مالي مرستو موخه د محصلینو له منځه د هغو غوره او ځلېدونکو محصلینو مالي ملاتړ دی، چې پیاوړي علمي، هنري او د مشرتابه مهارتونه او وړتیاوې ولري.

د وړتیا پر بنست تحصیلي بورسونه

کاردان پوهنتون د لیسانس او ماسټري دورو هغو محصلینو ته بورسیې او تحصیلي لګښتونه په پام کې نیولي، چې له علمي او انظباطي اړخه په تر ټولو غوره حالت کې وي. بورسیې او مالي مرستې د هرې تحصیلي دورې (پسرلني او مني سمسټر) په پیل کې محصلینو ته وړاندې کېږي او د همغه یوه سمسټر لپاره د اعتبار وړ وي، خو د محصل شراېطو ته په پام غځېدلای هم شي.

هغه محصلین چې لاندني شراېط پوره کړي د تحصیلي بورسیې وړ ګڼل کېږي:

  • غوښتونکي باید د کاردان پوهنتون د تحصیلي بورسیو فورم بشپړ کړي.
  • غوښتونکي باید لږ تر لږه په تېر سمسټر کې ۷۵٪ حاضري ولري.
  • غوښتونکي باید لږ تر لږه په تېر سمسټر کې ۴،۰۰ معادل ترلاسه کړي وي او ټولیز معادل یې باید ۳،۸ وي
  • غوښتونکی باید د مرکې لپاره حاضر شي
  • هغو محصلینو ته چې په ټولنیزو فعالیتونو کې فعال ګډون ولري؛ لومړیتوب ورکول کېږي.

پردې سربېره کاردان پوهنتون د تحصیلي لګښتونو ځینې نور ډولونه هم په نظر کې نیولي، چې په لاندې ډول دي:

په تحصیلي نصاب کې شامل او بهر فعالیتونو لپاره بورسیې

درسي فعالیتونه هغه دي، چې د تحصیلي نصاب شامل موضوعات په بر کې نیسي. د بېلګې په ډول: مناظره، ورځپاڼه او د کال کتاب د نصاب اړوند موضوعات دي او په ټولګي کې د محصل ګډون الزامي ګڼل کېږي. ددې ترڅنګ له نصاب بهر فعالیتونه د درسي پروګرام برخه نه وي، لکه: سپورت، په سپورتي کلبونو کې ګډون، د کلتوري ټولنو غړیتوب او په هنري ګروپونو کې کار کول او دې ته ورته نور له نصاب بهر فعالیتونه ګڼل کېږي. هغو محصلینو ته چې په درسي فعالیتونو او یا له نصاب بهر فعالیتونو او یا هم په دواړو کې له ځانه ښه وړتیا وښیي په تحصیلي بورسیو او مالي مرستو کې ورته لومړیتوب ورکول کېږي. د یادیو بورسیو او تحصیلي لګښتونو ډول د وخت په تېرېدو تغییر موندلای شي.

د تحصیلي بورسیو د ورکړې بهیر

هغه محصلین، چې د بورسیو د ترلاسه کولو په لټه کې وي د کاردان پوهنتون د تحصیلي بورسیو د ترلاسه کولو پروسیجر باید وڅاري. د تحصیلي بورسیو د ورکړې پروسه په لاندې ډول تر سره کېږي:

  • د تحصیلي مرستو او بورسیو د کمېټې له لوري د ټولو اسنادو او مدرکونو ارزونه
  • پر شراېطو برابرو کسانو سره د کمېټې له لوري د اړیکې نیول
  • غوښتونکو ته د بورسیو د ورکړې په اړه د کمېټې د پرېکړې اعلانول

د تحصیلي بورسیو د ورکړې په اړه اړمنو محصلینو ته د کاردان پوهنتون د وېب پاڼې، ټولنیزو رسنیو او د بورسیو او مالي مرستو دفتر له لوري خبر ورکول کېږي.