کاردان پوهنتون

څانګې

کاردان پوهنتون په کابل ښار کې د دریو څانګو په درلودلو سره، چې د متخصصو او مسلکي کسانو له لوري اداره کېږي؛ د زده کړو یو مناسب علمي چاپېریال رامنځ ته کړی دی. دغه څانګې د تایمنیو او دویم پروان څلور لارو کې موقعیت لري. ددې ترڅنګ، په دویم پروان کې د ماسټرۍ پروګرامونو لپاره ځانګړې ودانۍ هم بېله شوې ده.

د مالوماتو دفتر

د مالوماتو دفترونه لومړني ځایونه دي، چې کتونکي له هغو څخه لیدنه کوي. ددې برخې مسلکي کارکوونکي د نوم‌لیکنې او د هغې د شراېطو په اړه غوښتونکو ته اړین مالومات ورکوي.

کافه تریا

ددې پوهنتون کافه تریاوې ډول ډول خواړه او غیر الکولي څښاک توکي لري، چې قیمتونه یې هم مناسب دي. د غذایي خدمتونو ترڅنګ، د کاردان پوهنتون کافه تریاوې د کاردان له ټولنې سره د اړیکو نیولو یو مناسب ځای دی. دا کافه تریاوې هره ورځ فعالې او ګرانو محصلینو ته لازم غذايي خدمتونه وړاندې کوي.

د محصلینو خدمتونه

د محصلینو خدمتونو استازي د محصلینو د فردي او مسلکي ودې او پرمختګ لپاره کار او فعالیت کوي. مونږ محصلینو ته داسې پروګرامونه او خدمتونه وړاندې کوو، چې په خپله د علمي او مسلکي غوره والي ښکارندویي کوي.

د کاردان پوهنتون د کار موندنې خدمتونه

آیا د دندې په لټه کې یاست؟ آیا غواړئ زمونږ د کار زده کړې پروګرامونه وڅارئ؟ نو؛ که غواړئ له خپلې مسلکي پوهې سره کار بازار ته لار ومومئ، همدا اوس د کاردان پوهنتون د کارموندنې خدمتونو دفتر ته مراجعه وکړئ. موږ تاسو ته لارښوونه کوو او د بېلابېلو پروګرامونو او سیمینارونو پرمټ کار بازار ته ستاسو د لار موندنې دریڅه پرانېزو.

د مالي مرستو او بورسیو دفتر

کاردان پوهنتون د خپلو برحالو او نویو شاملېدونکو محصلینو لپاره د بورسیو او مالي مرستو خدمتونه په پام کې نیولي دي. هغه کسان چې علمي غوره والی ولري او په ټولنه کې فعال واوسې او هغوی چې د پوهنتون د نظم او ډیسپلین قواعدو ته ژمن وي، کولای شي د بورسیو او مالي مرستو شراېطو ته په پام له هغو ګټه واخلي.

د کتابتون خدمتونه

د مطالعې لپاره د آرام چاپېریال او بېلابېلو کتابونو برابرول د کاردان پوهنتون یو له بنسټیزو ماموریتونو څخه دی. محصلین کولای شي د کاردان پوهنتون په کتابتونونو کې په فزیکي او آنلاین ډول کتابونو ته لاسرسی پیدا کړي. دغه راز، هغوی له وړیا انټرنېټ او د مطالعې له آرامو خونو هم ګټه اخیستلای شي. له دغو خدمتونو د برخمن کېدو لپاره له مونږ سره یو ځای شئ!

د ګروپي کار خونې

آیا غواړئ، چې په ګروپي ډول مطالعه وکړئ؟ د کاردان پوهنتون کتابتون تاسو ته دغه فرصت برابر کړی، چې په یو بشپړ آرام چاپېریال کې خپل ګروپي کارونه ترسره کړئ. دغه خونې په مشخص ډول د ګروپي کارونو لپاره جوړې شوي، څو محصلین وکولای شي خپل ګروپي فعالیتونه په ښه ډول ترسره کړي.

کمپیوټر خونې

کاردان پوهنتون د خپلو محصلینو لپاره سمبال کمپیوټر لبونه او اړوند سافټویرونه برابر کړي دي. ددې ترڅنګ، په یادو خونو کې پرېنټر، سکنر او نور اړوند اړین مواد او تجهیزات هم موجود دي.

درسي ټولګي

د کاردان پوهنتون درسي ټولګي په LCD سیستم، سپینو دړو، آرامو څوکیو، او د ګرمۍ او یخنۍ پر وسایلو سمبال دي. دغه ټولګي پر یوخت د شاوخوا ۵۰ تنو ځای لري.

د کنفرانسونو تالار

دا تالار د سیمینارونو، ورکشاپونو او علمي غونډو د جوړېدو لپاره یو مناسب ځای دی، چې پر یو وخت پکې شاوخوا ۳۰۰ کسان ځایېدلی شي.

د لمانځه او مېرمنو د آرامتیا خونې

دغه خونې د ښځینه محصلینو لپاره د پوهنتون په ټولو څانګو کې ځانګړې شوې دي. هغوی کولای شي په فارغ وخت او یا د لمانځه د اداء کولو لپاره یادو خونو ته ورشي او په پوره ډاډ خپل عبادت ترسره کړي.

د استادانو ځانګړې خونې

آیا غواړئ، چې له ټولګي بهر خپلو استادانو سره وګورئ او د خپلو درسونو په اړه له هغوی سره سلا مشوره وکړئ؟ آیا غواړئ، چې د راتلونکو آزموینو په اړه له هغوی وپوښتئ؟ موږ د لا ډېرو آسانتیاو په موخه د استادانو لپاره ځانګړې خونې په پام کې نیولي، چې په اسانۍ وکولای شي له محصلینو سره وګوري او په بېلابېلو برخو کې اړینه مرسته او همکاري ورسره وکړي.

رقابتي بورسیې

کاردان پوهنتون د خپلو موجودو او نویو شاملېدونکو محصلینو لپاره رقابتي بورسیې په پام کې نیولې دي. ترڅنګ یې محصلین کولای شي مالي مرستو ته هم لاسرسی ومومي. مونږ ژمن یو، چې ټولنې ته یو رهبر نسل وړاندې کړو.

ساحوي کارونه

مونږ پر دې باور یو، چې په عملي درسونو کې د محصلینو د ګډون لپاره ساحوي کارونه کولای شي رغنده رول ولوبوي. له همدې امله مونږ خپلو محصلینو ته د عملي او ساحوي کار آسانتیاوې برابروو.

سپورټ

کاردان پوهنتون ژمن دی، چې د خپلو محصلینو او کارکوونکو لپاره د سپورټ آسانتیاوې برابرې کړي. همدا اوس مونږ د فوټبال، والیبال او کرېکټ ټیمونه لرو، چې محصلین کولای شي په هغو کې د غړیتوب له اخیستلو سره په ملي او د پوهنتونونو ترمنځ سیالیو کې ګډون وکړي. مونږ ددغو آسانتیاوو له برابرولو سره هڅه کوو، چې هغوی په ښه ډول خپلو موخو ته ورسېږي.

د فراغت او محصلینو د راټولېدو غونډې

د فراغت غونډې د محصلینو لپاره یوه نه هېرېدونکې پېښه وي، کوم چې د خپلې کورنۍ، خپلوانو او استادانو ترڅنګ پکې د خپلو علمي لاسته راوړنو نمانځنه کوي. دغه غونډه د محصلینو د تحصیلي دورې په پای کې جوړېږي.

مننه له دې چې د کاردان پوهنتون آسانتیاوې مو له نظره تېرې کړې!

که تاسو په دې اړه کومه پوښتنه او یا وړاندیز لرئ، هیله ده له مونږ سره په اړیکه کې شئ.

کور له مونږ سره اړیکې