خبرونه

کور / خبرونه

د محصلینو ټولنو د غړیو او سفیرانو کلنۍ غونډه جوړه شوه

د کاردان پوهنتون د محصلینو ټولنو او د پوهنځیو سفیرانو کلنۍ غونډه د پوهنتون د اجرایوي رییس ښاغلي میرویس نهضت او د یادو ټولنو د غړیو او رییسانو په ګډون، د ۱۳۹۸ کال د لړم میاشتې په ۹ مه نېټه د کاردان پوهنتون د تایمني څانګې د کنفرانسو تالار کې جوړه شوه.

په یاده غونډه کې د مناظرې، کمپیوټر ساینس، سیاسي علومو، انجنیري، ژورنالېزم او تجاري حکمیت ټولنو غړیو او د کرکټ، فوټبال او د نجونو او هلکانو د والیبال لوبډلو او د پوهنځیو افتخاري سفیرانو ګډون کړی وو.

په دې غونډه کې د محصلینو ټولنو غړیو د خپلو فعالیتونو او راتلونکو پلانونو په تړاو د کاردان پوهنتون له مشرتابه پلاوي سره خپل نظرونه او وړاندیزونه شریک او د محصلینو ټولنو استازو ته د هغوی د رغنده فعالیتونو له کبله ستاینلیکونه هم ورکړل شول.

د پروګرام په پیل کې د کاردان پوهنتون اجرایوي رییس ښاغلي میرویس نهضت، محصلینو ته د انګېزې ورکولو په برخه کې د یادو ټولنو د رغندې ونډې یادونه وکړه، ویې وویل: « په ۲۰۱۴ کال کې د محصلینو د بریالیتوب مرکز نظریه رامنځ ته شوه او تاسو نن د کاردان پوهنتون شاوخوا ۵ زره محصلینو او څه باندې ۳۰ زره فارغانو ته د انګېزې ورکولو او الهام بښلو الګو یاست. د پوهنتون مشرتابه پلاوی اوس ستاسو پر فعالیتونو او لاسته راوړنو ویاړ کوي.»

نوموړي د یادو ټولنو د مثبت رول په تړاو وړاندې وویل: « ستاسو تر ټولو مهم مسوولیت هغو ځوانانو ته انګېزه ورکول دي، چې له هېواده د کډوال کېدو په درشل کې دي، خپلې هڅې باید ګړندۍ کړئ، ځکه ستاسو ونډه په دې برخه کې واقعاً د اهمیت وړ ده.»

د پروګرام په ترڅ کې د یادو ټولنو د لاسته راوړنو په تړاو د محصلینو د بریا مرکز له لوري جوړه شوې ویډیو هم نندارې ته وړاندې شوه.

د غونډې په دوام د محصلینو ټولنو استازو د خپلو فعالیتونو او لاسته راوړنو په تړاو خبرې وکړې او د هرې ټولنې د ځانګړنو لکه د یو بل د منلو، هڅې او هاند، یووالي، انګېزې، ژمنتیا او نوښتونو یادونه یې وکړه.

د کاردان پوهنتون د ژورنالېزم ډیپارټمنټ افتخاري سفیرې آغلې سارا عزیزي وویل: « د ژورنالېزم پوهنځي د تاسیس له پیله موږ په رسنیزه برخه کې تر ټولو غوره فعالیتونه او لاسته راوړنې لرو. دې څانګې د خپلو محصلینو لپاره تر ټولو غوره تلوېزیوني سټوډیو فعاله کړې او د طلوع، آریانا او هشت صبح ورځپاڼې په څېر له معتبرو رسنیو مو علمي لیدنې ترسره کړي، چې محصلینو ته په کې د کار زده کړې زمینه هم برابره شوې ده.»

افتخاري سفیرانو او د ټولنو استازو د خپلو لاسته راوړنو د بیان ترڅنګ، د لوړو زده کړو د مناسبو فرصتونو د برابرولو له امله د کاردان پوهنتون له مشرتابه پلاوي مننه وکړه.

د کاردان پوهنتون د والیبال لوبډلې مسوول ښاغلي شعیب عزیزي د خپلو لاسته راوړنو په اړه وویل: « له سختو تمرینونو او هلو ځلو وروسته موږ وکولای شول خپل د والیبال ټیم د هېواد په کچه د مطرح ټیم په توګه وځلو. په لومړي ځل مو د مرکزي زون په سیالیو کې اتلولي وګټله او د والیبال په آسیایي لوبو کې د ګډون جواز مو هم ترلاسه کړ. دا واقعاً زموږ لپاره د ویاړ او خوښۍ ځای دی.»

د محصلینو ټولنو غړیو د خپلو ټولنو د پیاوړتیا او راتلونکو پلانونو په تړاو خپل وړاندیزونه د ګروپي فعالیتونو په ترڅ کې د کاردان پوهنتون مشرتابه پلاوي ته وسپارل.

دا پروګرام د کاردان پوهنتون د محصلینو د ګډون او پروګرامونو دفتر له لوري جوړ شوی و، چې د پروګرام په پای کې د کاردان پوهنتون اجرایوي رییس ښاغلي میرویس نهضت د یادو ټولنو استازي د ستاینلیکونو په ورکولو سره وستایل او پروګرام د یو ډله ییز تصویر په اخیستلو پای ته ورسېد.

کاردان پوهنتون هر کال د محصلینو ټولنو او سفیرانو د فعالیتونو او لاسته راوړنو د ستاینې او د هغوی د راتلونکو پلانونو د همغږۍ په موخه یاده کلنۍ غونډه جوړوي، چې له شک پرته د هغوی پر فعالیتونو د پام وړ مثبت اغېز ښندي.


شریک یي کړئ


اړوند موضوعات

د محصلینو ګډون او د پروګرامونو جوړول جندر او له فارغانو سره اړیکې په اداره او تجارت کې ماسټري په نړیوالو اړیکو کې ماسټري اداره او تجارت کې لیسانس اقتصاد کې لیسانس کمپیوټر ساینس کې لیسانس سېول انجنیرۍ کې لیسانس په سیاسي علومو کې لیسانس حقـــوقو کې لیسانس ژورنالیزم کې لیسانس