خبرونه

کور / خبرونه

د حقوقو ډیپارټمنټ محصلینو د سیرت النبي ﷺ د سیالیو لومړی مقام وګاټه

کاردان پوهنتون، د حضرت محمد ﷺ د میلاد مبارک د نمانځلو او د هغه ﷺ د ژوند او کړو وړو د پوهاوي په موخه د خپلو محصلینو ترمنځ د سیرت النبي سیالي جوړه کړه.

په دې سیالۍ کې د کاردان پوهنتون د اوو تحصیلي څانګو درې کسیزه ټیمونو برخه اخیستې وه، چې تر درې پړاونو سیالۍ وروسته د حقوقو ډیپارټمنټ لومړی، د سېول انجنیري دویم او د سیاسي علومو او نړیوالو اړیکو ډیپارټمنټ درېیم مقام خپل کړ. د دې سیالۍ لومړي مقام ته ۱۲ زره افغانۍ، دویم مقام ته ۹ زره او درېېم هغه ته ۶ زره افغانۍ نغدي ډالۍ هم ورکړل شوې.

د کاردان پوهنتون یو تن استاد ذبیح الله شریفي، چې د دې سیالۍ تنظیموونکی و، وايي: « د حضرت محمد ﷺ د میلاد مبارک د نمانځلو په اړه جوړېدونکي غونډې ټولې ګټورې دي. موږ پوهېږو، چې صحابه کرامو د میلاد نمانځنه نه کوله، ځکه پیغمبر ﷺ د هغوی په ذهن او ضمیر کې تل ژوندی او هېڅکله یې له زړونو نه بهر کاوه.»

ښاغلی شریفي زیاتوي: « موږ چې د حضرت محمد ﷺ میلاد نمانځو د سیرت النبي له حقایقو او محمدي رسالت سره د خلکو آشنا کول دي. د میلاد النبي نمانځنه په حقیقت کې د آسماني رسالت نمانځنه ده.»

د کاردان پوهنتون ډېری محصلینو د دې سیالۍ له جوړېدو خوښ وو او د پوهنتون له مشرتابه هیله یې څرګنده کړه، چې هر کال دې د محصلینو ترمنځ د سیرت النبي سیالي جوړه کړي.

دا لومړی ځل دی، چې کاردان پوهنتون د خپلو محصلینو ترمنځ د حضرت محمد ﷺ د میلاد مبارک د نمانځلو او د هغه ﷺ د ژوند او کړو وړو د پوهاوي په موخه د سیرت النبي سیالي جوړوي. دا سیالي د کاردان پوهنتون د تایمني څانګې د کنفرانسونو په تالار کې جوړه شوې وه او د یادو تحصیلي څانګو لسګونو محصلینو پکې برخه اخیستې وه.


شریک یي کړئ


اړوند موضوعات

د محصلینو ګډون او د پروګرامونو جوړول په نړیوالو اړیکو کې ماسټري اداره او تجارت کې لیسانس اقتصاد کې لیسانس کمپیوټر ساینس کې لیسانس سېول انجنیرۍ کې لیسانس په سیاسي علومو کې لیسانس حقـــوقو کې لیسانس ژورنالیزم کې لیسانس