خبرونه

کور / خبرونه

د کاردان پوهنتون رییس: د سویلي آسیا د غوره استاد لقب ګټل؛ د پرمختګ پر لور د هېواد یون څرګندوي

کاردان پوهنتون د یوې ځانګړې غونډې په ترڅ کې د سویلي آسیا د غوره استاد په توګه ددې پوهنتون د علمي کادر غړي ښاغلي قیس محمدي د ټاکل کېدو نمانځنه وکړه. یاده غونډه د لوړو زده کړو وزارت د یو شمېر چارواکو، د کاردان پوهنتون د مشرتابه پلاوي، استادانو، محصلینو او یو شمېر نورو علمي شخصیتونو په ګډون جوړه شوې وه.

د کاردان پوهنتون بنسټ ایښودونکي او عمومي رییس ښاغلی رویین رحماني تحصیلي بنسټونو ته د علمي اعتبار ورکولو شورا (ACBSP) له لوري د سویلي آسیا د غوره استاد په توګه د ښاغلي قیس محمدي ټاکل کېدل د هېواد د لوړو زده کړو سکټور د ودې او پرمختګ په برخه کې خورا لویه لاسته راوړنه وبلله، زیاته یې کړه، چې دا مهمه لاسته راوړنه د هر اړخیز پرمختګ پر لور زمونږ د ګران هېواد د چټک یون ښکارندویي کوي.

ښاغلي رحماني وړاندې وویل:« قیس محمدي د (ACBSP) په سږنیو نړیوالو سیالیو کې د سویلي آسیا هېوادونو ترمنځ د غوره استاد لقب وګاټه، چې له شکه پرته یوه لویه لاسته راوړنه ده او پر ځای ده، چې د هېواد ټولې تحصیلي کورنۍ ته ددې سترې بریا مبارکي ووایم.»

د کاردان پوهنتون عمومي رییس د لوړو زده کړو وزارت له لوري کاردان پوهنتون ته د علمي اعتبار سند د ورکړې یادونه هم وکړه، ویې وویل:« کاردان پوهنتون د خپل ژمن او علمي ټیم په مرسته له کمو امکاناتو او نژدې ۱۲ کلنې تجربې سره د هغو پوهنتونونو په ډله کې راغلی چې شاوخوا ۷۰ کلنه تجربه او پراخ امکانات لري. مونږ د کاردان پوهنتون د تاسیس له پیله تل هڅه کړې چې په ټولو برخو کې غوره واوسو ځکه غوره والی د کاردان پوهنتون د ماموریت مهم او بنسټیز اړخ تشکیلوي.»

د لوړو زده کړو وزارت د استادانو د تقرر او ترفیعاتو رییس پوهندوی محمد فیصل امین هم د غوره استاد په توګه د قیس محمدي ټاکل کېدل د هېواد د اکاډمیکې کورنۍ لپاره یوه لویه لاسته راوړنه بولي، زیاتوي:« اوسمهال مونږ په دولتي پوهنتونونو کې ۶۷۱۲ تنه علمي کادر او په خصوصي پوهنتونونو او لوړو زده کړو موسسو کې شاوخوا ۴ زره علمي کادر لرو، چې ښاغلی محمدي یوازې د افغانستان د یادو ۱۰ زرو استادانو ترمنځ دې مقام ته رسېدلی دی. دا واقعاً یوه لویه لاسته راوړنه ده او ټولو ته یې د زړه له کومې مبارکي وایم.»

نوموړي دغه راز کاردان پوهنتون ته د لوړو زده کړو وزارت له‌خوا د علمي اعتبار سند د ورکړې مبارکي هم وویله او کاردان یې د خپلو معیاري فعالیتونو له امله یو ژور اکاډمیک چاپېریال یاد کړ.

د سویلي آسیا غوره استاد او د کاردان پوهنتون د اقتصاد پوهنځي علمي کادر ښاغلي قیس محمدي یادې غونډې ته په خپلو خبرو کې وویل، چې نوموړي د افغانستان په استازولۍ د علمي اعتبار ورکولو شورا په نړیوالو سیالیو کې ګډون وکړ او د ۱۶ آسیايي هېوادونو د ۵۴ پوهنتونونو د استادانو ترمنځ یې یاد لقب وګاټه. ښاغلي محمدي زیاته کړه، چې یاده شورا هرکال د نړۍ له ګوټ ګوټ څخه د خپلو شاوخوا ۱۲۰۰ غړو تحصیلي بنسټونو ترمنځ د غوره استاد جایزې سیالي جوړوي او د یو لړ ځانګړو لارو چارو پر بنسټ د هرې سیمې لپاره غوره استاد ټاکي.

نوموړي هیله وښوده، چې په راتلونکو کلونو کې باید د افغانستان د لوړو زده کړو وزارت په همکارۍ یو ډېر شمېر پوهنتونونه دغو سیالیو ته لاره پیدا کړي او د هېواد د تحصیلي ټولنې لپاره لا ډېر ویاړونه راوړي.

د یادولو وړ ده، چې ښاغلي محمدي د غوره استاد جایزه، چې یو کریسټالي مډال دی؛ تحصیلي بنسټونو ته د علمي اعتبار ورکولو شورا (ACBSP) د کلني کنفرانس په ترڅ کې چې د روان ۲۰۱۹ کال د جون له ۲۱ -۲۴ مې نېټې د امریکا متحده آیالتونو د تکزاس آیالت په هیوسټون ښار کې جوړ شوی و، ترلاسه کړه.


شریک یي کړئ


اړوند موضوعات

بورسیې او مالي مرستې د کارموندنې خدمتونه د محصلینو ګډون او د پروګرامونو جوړول جندر او له فارغانو سره اړیکې کاردان کتابتون په اداره او تجارت کې ماسټري په نړیوالو اړیکو کې ماسټري اداره او تجارت کې لیسانس اقتصاد کې لیسانس کمپیوټر ساینس کې لیسانس سېول انجنیرۍ کې لیسانس په سیاسي علومو کې لیسانس حقـــوقو کې لیسانس ژورنالیزم کې لیسانس